مفيش حد شبهها – شعر عامية – طارق عميرة

لو كان في الدنيا شبهها

كان حال الدنيا اتغير

وجلال ربي اللي خلقها

بجمال في الخلقِ يحيّر

ما يساوي العمر معاها

غير وقت كبيره صغيّر

والكون بحدوده بحالها

ولا يعدل رمش قصيّر

في حاجات قلبي بيختارها

وحاجات مهواش متخيّر

***

ازاي الدنيا أمّا تضلّم

في ثواني تنوّر من نورك

وازاي لو جيت مرّة اتكلم

فكلامي بيعجز في حضورك

وازاي مابشوفش من الدنيا

غير دنيا متحاوطة بسُورك

وازاي انا ناقص من غيرك

تعبان ودوايا في مرورِك

وازاي في الدنيا مفيش أجمل

من واحد غرقان في بحورك؟!

***