Ara Books
حلمت إني في سنين
قابلت الصديق وقريته
وعرفت الكتاب وصاحبته
ودخلت فيلمي مثلته
من غير ما الاقي سيناريو
حلمت إني في يوم
هوصل لحلمي في نوم
فاصحى الاقي الكون
ثابت كما هو
أجدف بايدي وأعوم
على بحر شطه قريب
والحلم لسه بعيد
عديت في مركب زمن
جبت القاموس لحياتي
حاولت الاقي المعنى
واحتار في وصفي كشاعر
يجمع قصيدتي فى كلمة
يوصل لشط الحكمة
إن كنت مرة علمت
عمري ما هبقى فانوس
وإن كنت لغيري قاموس
فأنا لسه مابين الشوف
وطريقي دليل متقاطع
مع طرق الناس التانية
وساعات متوازي السكة
وبعدي الخطوة بخطوة
وبحاول أسبق خوف
بتعلم من التخبيط
من الفك ومن التربيط
في العلاقات البشرية
ومن لحظات البوح
النوح والدوح
بسبح في آيات الدنيا
الجهر
الجهر زي النار
جرئته بتلسع
الجهر زي النور
بعد الضلام يوجع
الجهر دايماً وزن
بيخف عن قلبك
والقلب مهما يبوح
عمره ما بيفضي
فكتبت سطوري شفافة
ونشرت روايتي متشافة
من غير ولا كلمة بحكيلك
وعزفت آلاتي موسيقية
تنطق كما مطرب لأغنية
أنا عدت فيا سنين ساكن
وأنا فاكر حلمي كما الذكرى
طريق
جوا مسار زمني
أنا كنت ليكي طريق
والحب بل الريق
لكني مشربتش
أنا بس وصلتك
للنهر عرفتك
كان دوري أبقى سبيل
لحياه تعيش فيا
فحلمت إني صحيت
جوا حياتي مشيت
قابلت الصديق وقراني
وعرفت الكتاب و صاحبني
ودخلت فيلمي كملته
من غير ما الاقي سيناريو
محمد ياسر الصدفي
من ديوان ” حلم الحياة “
الديوان يتواجد بمعرض القاهرة الدولي للكتاب من ٢٣ يناير إلى ٥ فبراير ٢٠٢٥ صالة ١ b55 الأدهم للنشر
