حكاية درويش – شعر عامي – هانية جمال الدين

هانية جمال الدين

رزق الكلام خباه السكات
موجود وبرده مالوش حضور
إنسان مفيش ليه إسقاطات
ومثالى ومصدق ده دور!

صمت الوجع مليان اهات
وده شئ ماينفيش الشعور
كل اللى عاش علشانه مات
ومفيش في قلبه غير القبور

بيناوله ليه حقوقه بفتات
وبيهدموه ولساه جسور..
مابيحنيهوش ليهم ثبات
بيعند مع اليأس و يثور

لف الموالد.. زار حانات..
جرب طريق حق و شرور
مكتوب حنيّن في الخانات
وجرايمه جت بشهادة زور

محتارة فيه قلوب البنات
و بيعشقوه عشق الفجور
وفي حضن بنت وحيدة بات
من ضمن أميرات القصور

لقى عقله بيها صبح شتات
ف مشاعره نار و ف قلبه نور
إحتلت الجاى و اللى فات
وهى اللى فازت بالعبور

وسمع كتير عنها حكايات
أسطورة على مر العصور
كل اللى قّرب منها فات..
بلعنة ما بعد الطرح بور

وعشانها صدّق في عبادات
وقلبه اللى كان يملاه الغرور..
قال مستحيل رب الهبات..
يحرمنى وانا عبده الشكور

عملوه ولي ودرويش ساعات
وفي كل حضره يروح يزور
من بعد عربيد في الحارات
فاسد ما بين نسوة وخمور

بقي شيخ محقق معجزات..
وكل الكلام حواليه يدور
مابقاش يفكر في صراعات
و شال إيده من كل الأمور

و برغم كل التضحيات..
وشوقه اللى ما دفنهوش فتور
عاش جوة سجن الذكريات
دور عليها.. مفيش عثور!