النور – قصيدة عامية – طارق عميرة

وأقُول إزاي وَحشتِيني

وشُوقي إليكي يملا بُحُور

وعَجزي إنّي أقولهَالك

مِخلينّي كمَا المَكسُور

وقلبِي جوّة أضلاعِي

مبطّلش في ثانية يدُور

وكلّ أما أدعي يا ربّي

يِزيد حبّي ولا المسحُور

كأنّ الدنيا على غفلة

بتنقل لي خبَر مَسرور

دي فيها اللي يِتعَاش لُه

ومن غيرهَا تموت مَقْهور

ما فيش غِيرك طَريق واضِح

وأنا قده ومش مغرور

فمش معقول تكون صدفَة

أقَابلك ده قَدَر مَقدور

ولو كان القدَر حُبِّك

فمن قَلبي وأنَا معذور

في كل طريق أنا مَشيتُه

بَشُوف الضلمَه سُور ورا سُور

لكن فيكِي وأنَا آسف

لأول مره أشوف النور..🌸

#طارق_عميرة